佘詩曼三點式派糧？有得諗

佘詩曼即將返內地開工，暫未能返無綫拍劇。

雖然《延》劇已播畢一段時間，但「延禧」效應仍十分強勁，前晚阿佘出席活動時，提到微博粉絲超越1,700萬都是拜《延》劇所賜，她說：「粉絲突然多咗500萬，多咗三分一咁多，威力好勁，冇諗過咁有影響力。平時甫文都諗咗先，因為好多人睇到，想畀正面影響佢哋。（甫多啲？）都係睇心情同時間，唔會刻意，想分享自己感受或者抒發吓。」若達到2,000萬粉絲，會否倣效惠英紅穿三點式派福利？她笑說：「三點式？諗吓！小紅姐身材咁正。」對於被無綫力邀回巢拍劇，阿佘表示暫時檔期未能配合，並透露將北上拍古裝劇，要到內蒙古拍足5個月，除了天氣炎熱，她最擔心需要策騎，因曾傷腰而留有陰影。

黃宗澤唔慣着鞋

至於早前腳傷的黃宗澤，終於不用再撐拐杖現身，他笑言反而仍未習慣着皮鞋，更笑說：「冇就住行，等佢（對腳）受壓，好似小朋友咁，唔打唔大。」提到受傷期間不能做運動，他笑言現在只隱約還有四舊腹肌，希望能盡快練回肌肉。對於吳卓羲將重返樂壇，他坦言等着與對方合唱，但講到自己的歌唱計劃，他則說：「學古天樂話齋：『好鍾意唱歌，但唔識唱歌。』係我人生座右銘。（擔心荼毒樂壇？）啲人有智慧，唔易荼毒，就算被網民洗版都係一個氣氛，人貴自知，好玩就玩。」

胡定欣戰鬥力十足，低胸裝又晒靚腿。	黃宗澤撩吳卓羲合唱。	Nichkhun圓潤不少。

其他出席的還有馬德鐘、陳瀅、吳克羣等，胡定欣則以Deep V晚裝亮相，甚有睇頭。同場的韓國男團2PM泰籍成員Nichkhun表示，今次來港行程緊密，未有時間觀光；另一韓團GOT7成員Mark則透露，短時間內會有新作慰粉絲，其他出席團隊還有乃木坂46三位成員及Boy Story等。