基仔走火入「摸」祖兒呻眼冤
古巨基前晚開騷，邀得容祖兒擔任嘉賓，13年後再合體「Juicy Lemon」唱歌掀起高潮！祖兒又踢爆基仔與古太十分癡纏，無時無刻都要摸住手仔，睇到她眼火爆！
歌手古巨基前晚在紅館舉行頭場《古巨基we世界巡迴演唱會香港站part 2》，唱到初戀主題的歌曲時，表示現時仍有收藏陳年情信：「古太胸懷大志呀嘛……係心胸廣闊先啱。」又分享保鮮婚姻的方法：「我久唔久會攞番婚紗相出嚟睇，睇番當時嘅笑容，記錄由情侶變成親人嘅里程碑。」
孖公仔搓嚟搓去充滿愛
席上，基仔邀得身穿Bra Top的天后容祖兒擔任嘉賓，重現13年前的「Juicy Lemon」，唱出Medley《狂串樂基兒》，全場High爆。祖兒笑指基仔整個演唱會都充滿愛意：「唔會錯失機會去表達對古太濃厚嘅愛意，究竟你想點呢？」又玩踢爆：「我有個問題擺喺心入面好耐，點解食親飯，基仔同古太永遠都係孖公仔咁，仲要隻手一定要摸住！基仔不斷幫古太搓嚟搓去，真係眼冤同火滾。」基仔即笑說：「佢有啲駝背，要幫佢捽番直。」祖兒繼續爆料：「其實Juicy Lemon嗰陣有一幕好難忘，有次準備上台嗰陣，見到基仔不斷咁搵嘢，原來係要搵古太隻手摸一摸，摸完先安心上台！當時唔知佢哋搞咩！」笑爆全場！
另外，祖兒擔任嘉賓前出席另一活動，獲頒「年度影響力歌手」獎，問到可有粉絲向她請教感情問題？她笑說：「感情我冇乜影響力，我係反面教材，應該問阿Sa（蔡卓妍）。」