余香凝爭影后千萬行頭壯膽
影壇新貴余香凝今年於金像獎「叫三飛」，首度入圍影后獎項的她，日前到珠寶店揀選閃爆行頭，試戴百萬后冠及過千萬鑽飾，珠寶店特別派出多位店員服侍，令她獲得猶如女王的招待，相當架勢！
《第38屆香港電影金像獎頒獎典禮》明日於尖沙咀文化中心舉行，現年25歲的余香凝（Jennifer）今年共有三項提名，包括「最佳女主角」、「最佳女配角」及「最佳原創電影歌曲」，究竟食白果定有獎攞？當日自有分曉！
戰期愈近，Jennifer當然愈忙碌，近日就忙着揀戰衣及首飾。日前，她到珠寶店揀首飾，第一次入圍影后，行頭當然要有番咁上下，珠寶店特別派出多位店員拿出近千萬鑽飾讓她任揀，她亦甚有眼光「非閃不揀」，全部都是閃爆亮眼鑽飾，6卡紅寶石、鴿子蛋鑽石項鏈等，她更睇中一個過百萬的鑽石后冠，店員為她戴上時，如公主加冕一樣，氣勢十足！
掃朱古力減壓
揀完鑽飾後，Jennifer與經理人閒逛商場，未知是否爭獎有壓力，當經過一間朱古力店時，即猶如磁石般「攝」了過去，左挑右選買了不少心頭好，明顯想以朱古力「抗壓」，最終滿載而歸！
事後，Jennifer接受訪問亦承認最近壓力很大，原因是頒獎禮當晚她要表演唱歌：「我好少唱Live，所以好緊張，呢排成日發噩夢，會夢見演出嘅時候個咪失靈又或者唱唔出咁，真係好驚，但我會盡力克服，希望當晚順利過渡！（有冇諗拎獎？）完全冇，所以呢方面反而冇乜壓力。」