朱晨麗唔怕醜孖何廣沛「赤裸」拍劇
朱晨麗及何廣沛這對緋聞男女合拍新劇，朱朱自爆劇中會「裝」廣沛半裸騷肌，又自爆兩人會「赤裸相見」，搞到廣沛大呼怕醜！
藝人朱晨麗（朱朱）、何廣沛、龔嘉欣及吳業坤等昨日在電視城為新劇《大醬園》拜神，講到朱朱和廣沛飾演歡喜冤家，朱朱自爆太入戲：「有時編審都話我可以唔使咁惡。」廣沛大呻：「佢將啲私人恩怨發洩喺我身上，次次拍親劇都對我好惡。（佢真人係咪咁惡？）真人好優雅，香港小姐冠軍。」朱朱則踢爆他會在劇中騷肌：「有一幕佢喺房入面半裸上身，我就喺出面個窗度裝佢。」
拍劇受傷有人錫住
問到兩人可會有親熱場面？朱朱說：「有一幕係我沖涼，佢就喺度游水，劇情係大家都赤裸嘅，都好尷尬，唔知到時會點拍。」廣沛表示會怕醜，朱朱說：「我唔怕醜，我有喺《3日2夜》睇過佢嘅身材。」講到之前拍劇受傷，她說：「所以要小心啲，So Far都OK，大家都錫住我。」她表示飾演古代速遞員，會踩三輪車，之後又會做「豉油妹」。問到廣沛可有肉赤？他說：「唔擔心，佢拍過《特技人》，都係半個特技人，佢仲要踩三輪車，我坐後面。（會唔會照顧朱朱？）都會。」
吳業坤幫龔嘉欣揸……
而嘉欣稱劇中教坤坤溝女，取笑他跟現實都是愛溝女，又大爆對方包起他們三餐：「因為佢依家排緊演唱會，所以我哋啲通告要就佢，半夜先拍劇。」講到她之前被拍到殘爆睇中醫，她說：「因為開工時間長，每日都係瞓四、五個鐘，有時甚至冇得瞓，捱殘咗，所以要錫番個身調理身體。」坤坤即表示會照顧嘉欣：「呢幾個月由我照顧佢，幫佢做埋司機，揸……佢架車。」
