演得好未必攞獎 惠英紅爭女配唔敢太老定
影后級的惠英紅憑電影《翠絲》，獲提名本屆金像獎「最佳女配角」。於戲中演家庭主婦的她，得知丈夫性傾向後的內心戲演繹，絕對向難度挑戰，加上她早前已在亞洲電影大獎中先拔頭籌，自然被睇高一線，不過她卻謙稱並非「坐定粒六」：「我對自己好有信心，但頒獎禮視乎評審口味，個個都有機會，演得唔好點入圍？」並自言不會對獎項抱太大期望，皆因以往不時「跌眼鏡」﹕「好似當年《倩女幽魂》，我覺得自己演姥姥好成功，最終入到圍但攞唔到獎。」
她不評論對手余香凝、周家怡、蔣璐霞及黃璐的演出，但直言最留意周家怡：「香港好少有演員演警察似過我，覺得佢有啲我嘅影子。」那麼是以平常心競逐？她說：「又唔係，每次有提名都會緊張，但好似坐低打麻雀咁，點知對手有乜章法？我冇諗定得獎謝詞。」
攤牌戲爆Seed
談到戲中演出，惠英紅與「老公」姜皓文攤牌時，由冷靜到尾段的歇斯底里，爆Seed演技令觀眾留下深刻印象，她對這場戲亦記憶猶新：「角色係個極要面子嘅過氣老倌，寧願同老公喺出面做戲，都要話畀人知有個完整家庭，好彩我都係半個戲劇世家出身，好明白每位舞者都想有完美演出，要成功迷惑台下所有觀眾。」
至於金像獎當晚的戰衣，原來惠英紅已獲品牌贊助，服飾將由米蘭空運抵港，性感留給後生，她就選擇高貴成熟路線。
場地：香港九龍東皇冠假日酒店