林子善收$300人情：永世難忘！
藝人林子善與太太董佩欣結婚一周年，原本值得紀念的大日子，竟被爆「300蚊人情」風波！有指子善「潤」朋友畀人情太少，永世難忘。昨日他受訪時強調是朋友之間開玩笑，大家何必認真。
結婚一年的林子善與太太董佩欣（Kary），原本打算到日本旅行開心慶祝周年紀念，但被一位朋友在Facebook（Fb）重新轉載「300蚊人情」風波來贈興！事緣去年4月，子善與Kary於酒店筵開63席，邀得好友鄭嘉穎、袁偉豪、馬國明及唐詩詠等組成星級兄弟團，場面星光熠熠，相當熱鬧。
主動要求參加婚禮
據知婚宴前夕，子善一名朋友表示很想出席婚宴，最終獲邀，對方當晚亦好盡興，頻頻與現場賓客影合照，並上載Fb。怎料事隔一年，該友人再度轉發相片及與子善的對話，引爆「人情」炸彈！
子善曾於該朋友的Fb留言：「你畀我份人情令我永世難忘！」之後更踢爆是300元，朋友則表示忘了金額，印象中是500元，若真的入少了錢，會親自找子善賠罪！子善回覆：「我諗你一定係放錯咗錢，人情$300其實我都冇乜所謂，你冇錢都冇所謂，我請你食飯都冇所謂好閒，最搞笑係你Facebook inbox我話想參與我嘅婚禮，最後一個咁嘅結果，嗰下我同我老婆真係笑咗出嚟。」並叫對方上網查閱去酒店婚宴的公價人情。
「我經常亂噏」
對於「人情惹的禍」，子善昨日受訪時坦言不想多講，以免愈描愈黑：「唔講咁多喇！總之我哋只係朋友間開玩笑，我經常都會亂噏o架啦！」之後他在社交網透露剪頭髮時遇上朋友，對方表示：「雖然我冇飲你嗰餐照畀300蚊。」他即耍手擰頭，擺明幽自己一默！