小春囝囝「失場」 最驚冇得去廁所
陳小春前晚到澳門舉行第七站巡演《陳小春STOP ANGRY巡迴演唱會》，大爆囝囝Jasper因擔心再被困房兼冇得去廁所而「缺席」，又透露正計劃2020年回歸香港開騷，首選紅館！
人緣甚佳的小春獲好友鄭希怡、囡囡梁浸浸及其父母、「富察王后」秦嵐、陳國坤及太太黃依汶、關心妍及老公、張耀揚、Kawaii、張啟樂等現身澳門威尼斯人金光綜藝館撐場。甫開騷他勁歌熱舞一輪後便分別用葡語、廣東話及普通話跟Fans打招呼，投票選出是晚的主語言，其中以廣東話歡呼聲最高「勝出」。唱出經典歌《友情歲月》前，他笑言此歌或「年長」過在場所有人，其後即轉感性Mode多謝Fans在這20年來對他不離不棄。
騷後小春受訪時冧指老婆專程拉大隊支持，令他不甘示弱自掏腰包買飛請朋友睇騷：「費事佢哋嚟到冇位坐。（囝囝唔係話嚟？）本身想，但老婆要招呼佢啲姊妹，驚佢嚟到冇人湊，況且第一場喺成都嘅時候，佢成晚喺房度睇，今次問佢嚟唔嚟，佢就以為又要困喺間房兩個鐘，冇得VV（去廁所）所以唔肯嚟。」相當爆笑！問到是否驚囝囝現身被搶風頭？小春笑言冇有怕：「點會介意呢啲嘢。」
Plan緊紅館騷
曾表示想於2020年、結婚10周年返香港開騷的他，被問到是否已準備入紙申請場地？小春笑說：「我都想，但唔係我話事，都有計劃緊，首選都係紅館，其他場地都有考慮，例如中環海濱、迪士尼。（鍾情戶外場地？）又冇特別話戶唔戶外，要搞都一闊三大，睇吓遲啲安排成點。」
講到早前孖囝囝再戰內地節目《爸爸去哪兒》第六季，但受內地「限童令」影響一直未能「重見天日」，原定去年8月播出亦一拖再拖，小春說：「由佢啦！唔識呢啲嘢，都冇辦法。」雖然節目播出無期，但他強調與囝囝於拍攝期間已有得着：「體驗人哋嘅風土人情同人情味，佢依家仲細未係好知，但相信佢大少少就感受到。」
特派記者梁楚君澳門報道