潘燦良愛浪漫 難忘偷吻余香凝
今年的金像獎「最佳男配角」競爭激烈，有資深舞台劇演員潘燦良與袁富華、老戲骨廖啟智、實力派演員黃德斌及李璨琛，個個皆是好戲之人！其中潘燦良相隔21年再獲提名，他坦言冇壓力，只諗住與女友蘇玉華怎樣扮靚靚！
潘燦良繼21年前憑《南海十三郎》後，再度在金像獎爭男配角獎，他坦言今次平常心得多：「我都唔係第一次，既然上次都過咗，今次只係其中一個過程，所以冇特別緊張，諗住嗰晚係去玩。有諗過會攞，亦諗過唔會攞，但都會諗定講咩（致謝詞）。咁係咪好希望攞呢？又唔係囉！心情係輕鬆冇壓力，當晚（女友）蘇玉華會一齊去，反而會諗大家着咩衫，諗衫多過諗獎！」
撐「自己友」袁富華
他自言已過了最恨攞獎的關口，第一次提名時真的恨攞，覺得是事業上一個重大契機，可惜最終跟獎項擦身而過：「嗰年我去唔到頒獎禮，因為要做舞台劇，演出時真係有啲心緒不寧，攞唔到係失望。」
21年後捲土重來，潘燦良對得獎信心只是普通，他直言看好同是舞台劇演員的對手袁富華：「佢嘅演出好好，個角色唔容易拿捏，加上角色有話題性，會比較受關注。當日佢攞金馬獎，我都即刻WhatsApp恭喜佢，好戥佢開心，尤其我哋作為舞台劇演員，唔容易喺舞台劇以外攞到好角色。至於智叔（廖啟智）係神級演技，要睇吓觀眾鍾意邊個多啲。」
潘燦良在電影中演活了典型小男人角色，他指偷吻余香凝一幕最難忘：「原本係講我哋喺沙灘漫步時我偷吻佢，但因為場地問題，所以改咗個場景，呢樣嘢令我幾耿耿於懷，可能我希望有嗰種浪漫感覺！」
場地：烏龍魚男