重溫親熱戲超尷尬 蔡卓妍：現實會拗親！
藝人蔡卓妍（Sa）、談善言、郭奕芯及導演曾翠珊前晚為英皇電影《非分熟女》謝票，近期走訪了多間戲院謝票的阿Sa，被問到可會喬裝入場感受真反應？她笑說：「又未試過喎！因為自己都睇咗兩次，又上網睇留言同影評，大致都唔錯，當然有好評亦有負評。」
戲中她與男主角吳慷仁有不少激情戲，問兩人坐在一起會否感到尷尬？阿Sa笑說：「基本上一到親熱場面，我哋就搵手遮眼唔敢睇，好尷尬呀！朋友仲話你唔敢睇呀，我睇到眼都唔眨呀！」她笑指身旁的郭奕芯同樣有親熱戲，郭奕芯自言好彩當日有條圍巾可以遮住自己：「因為得自己一個，聽住自己啲聲好尷尬。（咩聲？）做戲嘅『呼吸抖氣』聲，總之大家買飛入去睇就知。」
戥吳慷仁慘
阿Sa坦言拍完《非》片之後，情願性感都不想拍親熱戲，因為實在好辛苦：「啲動作係唔科學，基本上現實生活上係做唔到o架！（同男友試吓囉？）都話唔科學咯，根本能人所不能嘅動作，要你拗晒身，又對住鏡頭根本冇可能，Impossible，放入現實生活可能會拗親條腰同頸啦，拍攝時真係差啲拗晒四肢。」而她亦替對手吳慷仁慘，「銀」到腳瘀晒！