千嬅世巡開鑼哽咽等咗呢日好耐

天后楊千嬅前晚到廣州珠江新城海心沙展開《MY BEAUTIFUL LIVE楊千嬅世界巡迴演唱會》，獲老公丁子高及父母等到場支持。她全晚換上多套華麗服裝，身穿藍色露肩裙的她出場獻唱《可惜我是水瓶座》，之後換上連身褲跳唱《處處吻》等快歌，一口氣連唱多首金曲後，終於開口跟大家打招呼：「每個人都有自信、好有力量嘅時候，但其實當自己充滿自信同力量，係最脆弱、挫敗同冇安全感，我可以行到今日全靠心口一個勇字去迎接失敗，有大無畏精神係全靠有你哋嘅陪伴。」說畢唱出作品《勇》。

接着她換上紅色拖尾裙唱新歌《穿越》，並哽咽說：「好開心，夢想成真，我等呢日好耐，多謝你哋同我見證。」至Encore環節，她又一番感言：「呢個演唱會一直喺我心入面，好想有生之年可以去唔同城市開巡唱，見啲未見過楊千嬅嘅人，唱歌畀佢哋聽，多謝你哋同我一齊揭開序幕。」她感謝父母及身兼演唱會總監的老公：「多謝丁生鼓勵我，有咗家庭同小朋友後覺得呢個夢（世界巡唱）好遠，有一日佢鼓勵我去做，所以我先可以嚟到呢度。」

放大圖片	終於展開世界巡唱，楊千嬅勁感觸。	老公丁子高都有現身廣州捧場，連周柏豪都有到後台打氣。

隔條河見到周柏豪

騷後，她受訪時表示這場騷不容易：「因為啱啱成立新公司，好多嘢要重新去傾，未來一年我都會主力做巡唱，希望2020年中可以返嚟香港開。」問到是否特別有壓力？她說：「做新事係好冒險，但有個好嘅開頭係好大嘅強心針。」她指之前宣傳電影曾到不同城市：「Fans問我幾時開騷，我一直答唔到，所以今日做到都好感動。」又表示希望巡演期間能帶同父母，而囝囝因要返學，故今次沒有同行，可能會帶他到珠海一站。而於後台與周柏豪碰面的她笑言，開騷期間見到對方：「原來佢喺對面條河做騷。」

楊千嬅父母

配合連串快歌，落力跳唱。

（特派記者林惠珊廣州報道）