志偉「娶新抱」同台灣幫開戰
已故特技演員柯受良（小黑）之子柯有倫，去年與圈外女友Donna註冊結婚，昨於香港淺水灣舉行婚宴。一班「世叔伯」曾志偉、張學友、任賢齊、吳君如夫婦及吳宗憲等拉隊到賀，場面熱鬧。
現年38歲的柯有倫與拍拖2年多、年輕2歲的Donna，昨日在沙灘舉行切蛋糕儀式，大談相識經過，原來兩人在新加坡讀同一國際學校而認識，直至多年後重遇才擦出「愛火花」！談到相愛原因，柯有倫笑言：「第一，老婆是我生命入面最善良女子；第二，她是第一個進入我內心；第三，覺得自己變態，喜歡學妹。」
Call齊「世叔伯」
作為小黑生前好友的志偉甫到場，即儼如半個主人家，安排賓客與新人影合照。記者笑他是否為將來娶新抱取經？他笑言：「我當自己娶新抱o架喇，我同小黑（柯受良）係好兄弟，我同學友代表小黑嚟見證佢（柯有倫）結婚，我當佢係半個仔。」
志偉直言與小黑太太已一段時間冇見，但一見面就如家人一樣，問到會否想柯有倫盡快生B ?他說：「當然，小黑個女已經生咗三個小朋友，大仔都高過我……高過我係一個標準嘛！有倫結婚，我叫晒啲Uncle嚟，個個即刻Mark期。（責任重大，唔飲酒？）本來都咁諗，但頭先一見到啲台灣幫，佢哋問我有冇準備輪椅，我話我主場驚佢哋呀？不醉無歸啦！」
單拖赴會的學友，甫到場即獲小黑太太及細仔迎接，學友直言：「由細睇到佢（柯有倫）大，知佢結婚好開心，希望佢哋繼續幸福快樂，（想佢快啲生B？）要啦，追番啲細佬妹。」