鄧一君驚爆婚外情可能得罪人

現年42歲的鄧一君於90年代憑電影《記得…香蕉成熟時》令觀眾留下印象，並有「香蕉仔」之稱號，2005年淡出娛圈結婚，並育有一女。今年2月，他嘗試創業於油麻地開設車仔麵店，看似家庭事業兩得意，不過日前卻有讀者爆料，指他與太太感情出現問題，早已貌合神離，並有「小三」Erica出現，對方更在其車仔麵店打點，儼如老闆娘一樣。

日日落舖幫手

大前日，被指是「小三」的Erica被拍到在麵店工作，直至晚上6時許，鄧一君到場跟她說了幾句，即被食客認出並要求合照，他影完相便離開，女方工作至麵店收舖後，才搭車回家；前日，Erica亦有到麵店開工。

對於被指有婚外情，對方更經常如「老闆娘」般到麵店坐鎮，鄧一君接受訪問時否認有第三者，並指對方是其私人助理：「佢幫咗我十幾年，呢排麵店請唔到人，所以要佢日日落去幫手，佢有老公、小朋友o架，唔好影響到人哋屋企，我哋兩家人都識。」

老婆覺得好笑

問是否得罪人？他說：「我都有諗，唔知係咪呢排我太高調，得罪咗人都唔知，同埋麵店有時生意好，會排長龍，唔知係咪阻到人，如果真係嘅話，希望對方有怪莫怪，唔好嬲啦！」問到有否向太太備案？鄧一君笑言：「梗係有啦，佢哋（指太太與私人助理）都好熟，覺得好好笑，仲問我係咪得罪人。」

鄧一君在麵店與粉絲合照，Erica亦在場。

忙於做生意的Erica落手落腳打點。

童星出身的鄧一君於1994年憑電影《記得…香蕉成熟時》，獲提名香港電影金像獎最佳新演員，當年更獲張國榮點名讚賞，之後加入TVB拍攝《美味天王》、《尋秦記》等劇集。