楊千嬅美麗人生唱勻全球

千嬅1995年參加「新秀」歌唱比賽入行，在樂壇打滾了24年後，今晚終於如願在廣州珠江新城海心沙為其《MY BEAUTIFUL LIVE楊千嬅世界巡迴演唱會》揭開序幕，兩萬張門票早已售罄。她坦言舉行一個完整具規模的世界巡迴演唱會一直是其夢想，因為從未試過：「呢個夢想我擺咗喺心10年，曾經喺我最想做嘅時候，有好多原因做唔到，係有啲氣餒同覺得遺憾，但人生冇完美，直至有一日丁生（老公丁子高）提出同鼓勵我去做，又機緣巧合下得到主辦單位邀請，可以夢想成真，好感動！」

入紙紅館 明年回歸主場

今次世界巡演預計為期逾一年，由內地出發，之後陸續巡迴美加、新加坡、澳紐，甚至有機會到歐洲，計劃尾站明年3、4月回歸香港主場，已入紙紅館申請，千嬅說：「有朋友好奇點解我要等到45歲，咁辛苦先嚟博呢啲。呢件事係唔容易，要投資好多心機同精神，但對我嚟講係夢想，如果冇做過第日後悔咪仲慘？歌手喺舞台上應該不斷成長，我希望能夠超越到自己，好多人喜歡我，但冇機會見我做Live騷，好好醜醜畀我去一次唔同地方，親身唱歌畀大家聽，分享我嘅音樂、我嘅人生。」

巡唱固然辛苦，但比起疲累，千嬅更怕後悔！	千嬅不敢怠慢，勤力練舞，不容許有絲毫差錯。	巡唱以「美麗人生」為題，千嬅會唱盡歷年金曲。

問到何謂「美麗人生」？千嬅認為人人出生時甚麼都沒有，但當回望過去每個人生階段，歷盡高高低低，即使碰上最艱苦及最令人挫敗的事，其實依然美好，否則不會有智慧行到今天：「我啲歌曲好神奇，咁多年紀錄咗我人生每個階段，我好想鼓勵大家，無論生活點被動、點艱苦，如果你有呢個堅持，你都有權利去追求自己嘅夢想，後生仔更加唔應該咁易放棄！」今次巡迴演唱會Rundown，會以一貫「楊千嬅式」作品會歌迷，以廣東歌為主，她說：「我出道到依家都係唱廣東歌，大家鍾意我都係因為我唱廣東歌啫，不過都會唱我喜歡嘅華語歌。」

與老公丁子高拍住上，安心得多。	每逢千嬅開騷，頭號Fans丁子高同囝囝Torres例必捧場。	千嬅拍攝巡唱海報，開心到彈起！

開騷日子就晒乖仔

與老公丁子高自組公司拍住上，千嬅覺得是天經地義：「其實男人娶老婆，嗰份合約咪『經理人合約』，經手人同經理人一齊簽！」她自嘲不懂做生意，所以只會做回藝人本分，老公則負責管理工作：「其實同以前冇分別，但自由度梗係大啲。呢樣嘢一個好親嘅人去做有好有唔好，好嘅係我唔使解釋咁多，有咩直接講，唔好咪有時會意見分歧，但好小意思啫，始終我係感性，佢係理性，咁先一齊到，唔係就攬炒！你諗吓嗰個係自己老公，佢唔會害你吖嘛！」

主辦方特別搭建1：1舞台讓千嬅綵排，令她又驚又喜。

城城與千嬅主演新作快將上映。

夫婦二人除了齊心，理念亦是一致，同樣非常重視家庭，千嬅說：「無論發生咩事，我一定係屋企行先，我係揀屋企先結婚生仔。」她坦言珍惜親子時光，而未來一年的巡演安排早已編好，最重要是配合兒子Torres的假期：「一簽呢個Tour就同主辦講好，復活節、暑假同聖誕都唔做，暑假我會放一個月，我得一個仔，要陪佢。」提起寶貝仔，她表示每天早晚都會陪食飯傾偈，經常被搞到哭笑不得：「我問佢點解唔同我講你心裏面諗咩，而係同我講新玩具邊個發明？佢話學校嗰啲唔需要講，講玩具係因為驚媽咪唔識，想我知依家嘅新嘢喎！」

搭1:1舞台自娛爆喊

主辦單位不惜工本製作今次巡演，千嬅第一眼見到主辦單位為她貼心地在江門體育館搭建與正式舉辦場地1：1的舞台讓她綵排時，心情複雜又激動，更忍不住落淚，形容已為自己演出了第一場。她更率先爆今次巡演有特別安排，與團隊曾秘密飛到新西蘭拍外景，重金打造一條美麗人生的概念短片，安排在換衫時段播放：「我喺新西蘭爬上高峰，好辛苦同好危險，但當我企喺高峰遠望，唔係覺得個景靚到呆，而係覺得世界好大，我只係一粒塵咁細。」她深深體會到時光飛逝，應該做自己想做的事，根本冇時間計較和不快，而且背負不少責任，希望再進步超越自己，她笑說：「每次開騷都係好辛苦，我冇覺得自己歎過，從來冇食過老本o架！」

50歲退休做旅遊達人？

唱而優則演的千嬅，今年除了瞓身搞世界巡迴演唱會外，相隔17年後，去年更重返無綫夥拍陳煒、周柏豪、朱晨麗等拍攝劇集《多功能老婆》，今年乘勢播出。至於她與郭富城首次合作主演的電影《陌路人》，亦快將上映。

廣告方面，千嬅同樣吸金力強，早前一口氣拍了三條理財廣告，其中一條更是夫妻檔上陣，兩人化上老妝，寓意一生相愛，白頭到老。另一則廣告中，她分享自己在30、40及50歲的人生經歷及願景，問到預想50歲有何計劃？她坦言很矛盾，因為自己很貪心，既想退休，又忍不住想挑戰自己。她更計劃退休後開旅行社，成為旅遊達人，一邊享受慢活，一邊工作，笑說：「無論退休生活如何，我都會繼續保持紫色頭髮及健康體格！」