袁偉豪張寶兒歐遊睇景影婚照
無綫劇集《鐵探》演員袁偉豪、惠英紅、姜皓文、蔡思貝、張寶兒及黃智賢等，昨日在將軍澳出席記者會。袁偉豪與張寶兒剛由巴塞隆拿旅遊返港，問可有順道影婚紗相？袁偉豪笑說：「今次係為《使徒行者》電影版去歐洲宣傳，趁有時間自己去巴塞隆拿玩兩日，影婚紗相要搵人幫手先得，唔通自拍咩！你當我去睇景啦！」曾在英國讀書的寶兒則坦言喜歡歐洲景色。
惠英紅扮「套女郎」
問是否揀好教堂行禮？袁偉豪說：「隨心，不過喺教堂做呢件事分外有感覺，好莊嚴、感人。（求咗婚？）未！上次攞住嗰條係草嚟嘅，唔係戒指，呢樣嘢唔可以草草了事，再畀啲時間我。人哋個寶貝女嚟，求婚係誠意嘅表達，再計劃吓。」寶兒亦幫口：「畀啲時間佢，唔係淨係結婚咁簡單，佢本身都有負擔。」二人劇中飾演上司下屬，寶兒笑說：「同場都係佢指揮我，我答Yes Sir，平時就冇咁順攤。」袁偉豪即自爆平日他會說：「寶寶，你唔好咁啦！」超級冤氣！
至於影后惠英紅相隔10年再拍無綫劇，坦言心情緊張，問到成績好會否再以三點式泳裝慰勞觀眾？她笑說：「唔會啦！上次都着咗！」但揚言若有33點收視，會在鬧市「快閃」笠絲襪扮安全套影相放笑彈，更笑說：「幾好玩吖！」
