陳松伶被屈不育勁尷尬

情緒高漲的松松捉住余德丞起勢「糟質」，場面搞笑。

藝人陳松伶、陳煒、江嘉敏與余德丞等，前晚飯敍兼齊齊收看劇集《福爾摩師奶》，松松坦言想監製開拍續集，問到想演甚麼角色？她笑說：「想做開膛手，呢套劇結局到最後一個鏡頭先會解開謎團！套劇本身叫《危城First Lady》，之後再拍可以叫Second Lady、Third Lady，拍到100都得o架！或者叫《福爾摩師兄》、《福爾摩師傅》之類啦！」

老公張鐸唔介意

談到已兩星期沒見老公張鐸，松松不諱言要趕返北京「交人」，對於被指曾做婦科手術致不育，她澄清該報道沒向她求證：「寫到唔清唔楚，令我好尷尬。（依然想生B？）當然。（會唔會雪卵？）私人事唔應該拎出嚟講。我有就篇報道問老公介唔介意，佢話唔想花工夫同佢哋講呢啲事情，反而最介意係姨甥同其他小朋友嘅相冇打格！」另外，有指其老公張鐸向來理財有道，內地有六個物業，香港亦有三個，加上松松接劇及登台價可觀，保守估計每年進帳千萬，二人身家已達3億港元！

陳煒擔心舊同事

至於陳煒坦言不捨同劇拍檔，拍續集與否交由監製決定：「我就想再開飲食節目，因為未搵到男朋友，唔可以令工作停落嚟。」談及亞視再裁員，她說：「等我下個月去『A記同學會』問候吓舊同事，巿場真係不景氣，好多幕前幕後都轉行，始終要養家搵食。」余德丞則被問到同參與遊戲節目《娛樂大家》的郭子豪涉酒駕被捕，他表示尚未慰問對方，問是否起警惕作用？他說：「我出事後冇再飲酒，所以酒駕呢件事絕對同我劃清界線！」

陳煒係咪叫松松冷靜啲？	松松與老公張鐸都喜歡小朋友，希望有好消息啦！	感情空白的陳煒，以工作填補空虛。
《福爾摩師奶》台前幕後，約埋食飯兼睇劇。