李明蔚生命倒數出書勉勵病友

李明蔚病情嚴重，但仍樂觀抗病，活出精彩人生。

29歲的李明蔚於2010年以組合「小龍鳳」出道，不過入行僅兩年即不幸患上罕見的腺樣囊性癌，令聲帶出現問題不能再唱歌，失去人生樂趣，歌唱事業亦叫停。抗癌7年花掉約50萬積蓄，雖然病情一度穩定，以為重現曙光之際，近日其病情卻急轉直下，醫生指其腫瘤已擴散至肝、腎多個器官，出現多種病徵。

瞓覺要膠紙黐眼

李明蔚日前在模特兒好友姜紫藍陪同下受訪，李明蔚說話時顯得口齒不清：「依家面癱，有時仲會不自覺流口水，講嘢亦唔清晰，眼神經亦影響到眨唔到眼，每晚瞓覺都要用膠紙黐埋先可以瞓到，係好辛苦，同埋醫生話我個腫瘤大咗4cm，就算化療都冇用。」談及病情時仍一臉堅強，惟當提到出書一事，她不禁灑淚並指現時只有一個心願，望7月於書展出書，記錄抗病歷程，她說：「唔知自己仲有幾多日子，希望出到本書，講我患病後嘅點滴，用文字鼓勵同我一樣嘅病人要有正能量。」

兩遇情傷遭離棄

曾徘徊「鬼門關」幾次的她，坦言最艱辛的時刻已經過去：「做完治療後試過突然流鼻血，流到開水喉咁，嚴重到要入院止血，因為流到血塊阻塞，要喺喉嚨開窿做手術，嗰刻有諗過係咪會死，住咗個幾月醫院，最終都捱到，每次都以為自己唔得，但原來發現自己嘅意志力真係好強。」又透露患病後經歷過兩次情傷，都是因為其病況而離她而去，令她心痛不已。不過她深明勉強冇幸福的道理，只好忍痛放手，祝福對方找到幸福，覺得有家人的陪伴更為重要。

姜紫藍（左）陪同李明蔚見記者，說到傷心處，李明蔚不禁落淚。	李明蔚一直積極對抗病魔。	馬浚偉曾為李明蔚（中）打氣，旁為胡定欣。