Chilam做「搓哥哥」撩女玩人鬼情未了

今次請來長青男神Chilam與幾位女粉絲整麵包及流心芝士撻，自稱試過在家中整出好味麵包，且曾在電影內扮演糕點師的他，臨場卻「錯漏百出」，令現場充滿笑聲，氣氛相當融洽。

Chilam甫到場即被手持的圍裙「考起」，製作流心芝士撻時，麵包師指導大家將流心唧落撻皮，本來牙擦擦的他見工序看似容易，竟誇下海口說：「即係做到『劉心悠』效果啫……睇嚟冇難度喎！」但當完成步驟，流心即時斜傾，搞到他尷尬說：「睇嚟我都係冇乜天分！」

搞到壽星女眼濕濕

其後他「搓哥哥」上身，主動提議與粉絲上演一幕「搞笑版人鬼情未了」，齊齊玩搓心形麵粉，鐵粉Miko豪爽支持：「我哋梗係醉翁之意啦，捉手仔先。」而粉絲德德事前明言最大心願是可以讓偶像為她慶生，Chilam有求必應即悄悄安排一切，於活動尾聲突然推出蛋糕，更帶頭為對方唱生日歌兼自拍，搞到壽星女感動到眼濕濕！

乜都傾得似家人

幾位粉絲又順勢向Chilam「逼供」，當被問到何時再開演唱會，Chilam竟忽發奇想：「我想開Talk Show多啲，睇好多荷里活演員喺Standup Comedy演出會突然爆粗，換咗另一個人咁，反應又好，我都應該練吓，嘗試向呢方面發展！」搞到一眾粉絲嘩然兼拍掌支持。

Chilam與女粉絲搓麵粉，提議玩「搞笑版人鬼情未了」！（設計對白）	做出心形動作，好冧呀！	整完麵包及芝士撻，Chilam與大家分享成果，合上眼食得滋味！

談到今次Gathering，Chilam自言意義非凡：「呢排拍嘢好少見佢哋，而佢哋追隨咗我咁多年，大家好似家人咁乜都傾得，包括是非及麻雀經。正所謂『送人玫瑰，手有餘香』，難得有咁嘅機會，何樂而不為？希望以後定時都可以有類似嘅聚會！」

而身為今次「主人翁」的德德多謝本報給予機會，讓她與偶像有如此親密的接觸：「Chilam曾經講過，話『你喜歡誰就該見見他，這才不枉此生』，呢句說話影響咗我好多，亦因為追Chilam嘅關係，令本來冇乜朋友嘅我，認識咗兩位志同道合，人生有個轉變。」