金鐘國想睇光洙食蛇
早前來港拍「黃Viu煲劇平台」不眠旅遊真人騷《No Sleep No FOMO》的韓國男星金鐘國，於新加坡接受本報訪問，指若可自選拍檔，會選好友李光洙：「因為佢好笑，令人開心，當我食蛇羹時我就諗起佢，想睇佢食蛇個樣！」愛健身的他卻不想另一半參與：「其實我唔想女友成日健身，只想佢欣賞我健身。如果我第時結婚，都想健身係留畀自己嘅私人時間……或者我哋應該簽唔同嘅健身室！」
韓國男歌手Eric Nam談到拍攝節目最大挑戰：「最難頂係食超級漢堡包，我食咗5個，Paul Foster食咗6個，之後40幾個鐘我個肚都唔舒服，拍攝期間成日要去廁所！」韓國男子組合U-KISS前成員Alexander Lee Eusebio則用廣東話表示：「我上年聖誕嚟過香港，食晒想食嘅嘢！」
香港女星譚杏藍（Hana）指ToNick主音男友趙善恆不介意她在節目穿泳衣：「我跳瀑布時好驚，都冇理着乜，男友一向為我身材自豪，佢冇問題，依家即場可以全裸……講笑咋！」
特派記者甄子健新加坡報道