杜小喬明戀撻Q生仔要等等
有「娘娘」之稱的網絡女神杜小喬，今年進軍樂壇做歌手，她自認歌藝不精，但期望做到以歌代言。人仔細細的她自爆恨結婚生仔，更透露早前戀情無疾而終，言談間充滿無奈。
杜小喬推出第一首派台歌《泡泡裏的空氣》，作為樂壇新人，她坦言現階段不敢把目標定得太遠，只希望能透過音樂說故事：「自己唱歌技巧唔係好叻，但係聲線擁有講古仔或者感染人嘅能力，想藉住歌詞講自己嘅故事，因為我唔係一個擅長表達內心嘅人，就算有時被誤會，我都唔會解釋。」
記性奇差
儘管在出道前經常面對鏡頭，但她坦言仍極度缺乏自信：「有時人哋睇我好光彩，但我自信心都係唔夠，會好自卑。我經常懷疑自己，問自己點解身邊同年齡嘅人成就能夠比我好。其實我依家每次出席唔同Public Event都會好緊張。」自認記性差的她，笑指記歌詞相當有難度：「以前睇人演唱會覺得有咩咁難，原來到自己唱真係會唔記得o架！」
慘食檸檬
至於感情方面，28歲的她恨嫁恨到出口：「由細到大，我最大嘅夢想就係可以快啲結婚生仔，本來計劃28歲已經有小朋友，但原來自己未夠努力，事業上未夠好，冇辦法養到一個小朋友。」她更自爆已有心上人，無奈最後都無疾而終：「我心目中有好鍾意嘅人，我係明戀o架！只不過我哋嘗試過後，發現唔適合。（依家仲鍾意佢？）我人生可以再好啲！」
場地：Cookology