余思霆暗戀唔敢講呻走寶

陳曉華貼身裝要「縮肚」，相比余思霆露纖腰，睇嚟要努力啲減腩！

前華姐冠軍余思霆、出爐華姐冠軍陳曉華與應屆港姐丁子田、鄧卓殷及一班女藝人，昨日到維園出席香港花卉展覽「大紅花說願」攝影比賽。眾人以特色造型現身，其中陳曉華一身充滿香港特色的貼身打扮，余思霆則化身印度西施露纖腰，笑言特地節食兩日：「明明依家冬天，我都未準備好除衫！」陳曉華自言有小肚腩，故要經常縮肚，免得圖案變形。

講到昨日是白色情人節，余思霆表示收過男仔送朱古力，問到可有主動出擊追男仔？她坦言冇：「試過暗戀，但冇講畀佢聽。（暗戀咗佢幾耐？）直至佢結婚為止。」她又呻後悔莫及：「記得有年萬聖節，我哋約出嚟玩鬼屋，我驚到捉實佢隻手，有嗰種戀愛嘅感覺。直至前幾個月佢結婚，我哋傾番先知佢當時都鍾意我！（你做咩當時唔講？）怕醜囉！其實萬聖節嗰晚佢想約我食飯，但我因為有事去唔到，如果當時有去，結果就可能會唔同，諗起都有啲可惜！」最後亦沒有出席對方的婚禮。

陳曉華追男仔百發百中

至於陳曉華則自爆追過男仔：「細個主動啲，可能我性格男仔頭啲，試過兩次都成功，百發百中o架！」問到現時可有追求者？她坦言沒有，現時身邊多女仔朋友。余思霆亦呻冇人追，歡迎港男追求，問到自上段戀情後是否準備好再拍拖？她說：「冇話唔Ready，呢啲嘢隨緣，依家專心做嘢。」

丁子田同樣扮印度西施，晒腰示人。

鄧卓殷一身飛女造型，充滿香港懷舊特色。