甄子丹樂做星爸驚唔夠揪

「宇宙最強」甄子丹與太太汪詩詩的女兒甄濟如及兒子甄濟嘉盡得優良基因，能文能武，兒子遺傳爸爸的武術基因，早前在社交網短片中打到拳拳到肉，有板有眼，他大讚兒子有天分，更笑言很快不夠他打：「佢好細個嘅時候，我已經畀佢學跆拳，佢依家好似係啡黑帶，呢幾年有畀佢學巴西柔術，因為我都有研究唔同嘅武術。（等佢大啲同你切磋？）我就嚟唔夠佢打！」至於女兒甄濟如能歌善舞，早前更擔任時尚雜誌封面女郎，被睇好有潛力加入娛圈，子丹笑言女兒雖有表演欲，但其實十分怕醜：「佢兩、三歲就開始跳舞唱歌，佢真係鍾意表演，但私底下係好怕醜。」

思想要夠成熟

談到是否入行，子丹持中立態度：「我又唔會好抗拒，如果機緣巧合嘅話，我都會支持，但要讀好啲書，唔一定要大學畢業，最緊要係思想要成熟。（細細個已經培育佢？）冇刻意，同其他父母一樣都想佢學多啲嘢。」

主力監製新片

工作方面，子丹連續七年擔任《寶馬香港打吡大賽》的「打吡大使」，自言十分榮幸，更指打吡精神要不斷挑戰自己，故近年他多參與監製工作，早前有份監製及主演的電影《大師兄》大獲好評，他指因過去拍過不太成功的電影，令他知道監製的重要性：「之前我拍過啲戲唔係好成功，我唔係想將呢個責任推喺其他監製身上，但的確好多電影所謂監製，佢投入嘅程度、能力，或者本身有冇盡全力將部電影拍好，都會產生好多參差不齊嘅電影，所以嚟緊我都會投放好多時間喺呢個崗位，因為觀眾對電影嘅要求愈嚟愈高，我必須要把關。」

場地：香港賽馬會