何廣沛奉旨談情怕對厭朱晨麗
無綫新劇《大醬園》演員何廣沛、朱晨麗、龔嘉欣、吳業坤、江嘉敏及黃嘉樂等，昨日在將軍澳電視城試造型。首次做「男一」的何廣沛與緋聞女友朱晨麗奉旨談情，玩遊戲時，朱晨麗扮呷醋，指男方早前與龔嘉欣出埠拍旅行節目，罰他食浸過白醋的朱古力。
何廣沛透露與朱晨麗飾演歡喜冤家，可以糟質對方：「感覺幾爽，上次佢喺《超時空男臣》不斷糟質我，今次可以還手。」問到是否攞正牌談情？他笑說：「係囉，再續前緣，今次又可以相處吓、了解吓同合作吓，但都怕見到厭，又係你呀朱小姐？」朱晨麗亦稱「對到厭」：「不過OK嘅，做嘢啫。」
龔嘉欣有懷孕感覺
至於龔嘉欣因耳水不平衡入院，昨日出院即出席活動，她笑言：「耳水不平衡完全係有懷孕嘅感覺，成日都想嘔，依家唔可以亂咁郁，唔可以跳跳紮。」她玩遊戲時逼吳業坤喝辣椒醬，笑言報復對方毁了她的「貞節牌坊」：「講吓笑啫，我意思係佢搞到我哋傳緋聞，自己都好驚有緋聞，所以想喺拍劇之前講清楚。」並強調與對方沒發展可能：「就算隕石撞地球都唔會。」
