湯怡當街遭淋紅油：點解咁對我？

無綫劇集《極道怪咖》昨晨於銅鑼灣鬧市取景，湯怡冒雨拍攝一場被淋紅油的戲份，吸引大批途人圍觀。見她一臉緊張，埋位前不停與導演、負責淋紅油的演員試位，確保能一take pass。

全劇組興奮叫好

湯怡受訪時大呻全劇組得悉她被淋紅油，紛紛興奮叫好：「我平時對佢哋都唔差，點解要咁對我？因為啲紅油係番茄醬溝水，佢哋個個都話要買定薯片點嚟食，想報復我。我第一次拍呢啲場口，前一晚都唔係好瞓到，開早都係特別多嘢諗。」又指做好打底措施：「着咗件泳衣喺入面，劇組都好好，拍完安排架車車我返屋企梳洗，預咗全身濕晒，由頭淋到落腳。」問到為何會被淋紅油？她說：「戲入面我飾演中學老師，但有社團背景嘅爸爸想我做社團大佬，加上得罪咗蔣家旻。（希望一take過？）想呀，濕晒都好難再拍。」

預告床戰王浩信

她透露日前與王浩信拍了一場親吻戲：「全部都唔係借位錫，大家好緊張，拍嗰陣心跳加速。（尷尬？）還好，我戲裏戲外都好怕醜。」更預告下星期拍攝醉酒床戲：「要裸睡咁，都幾sexy。（大尺度？）喺電視上都OK大，幾激烈。好彩唔係一開劇就拍，同王浩信都熟咗，佢仲帶動我好多。其實之後仲要拍一場綁架戲，要吊起我，唔知點解啲工作人員聽到又係好興奮！」

湯怡遭兩名大漢潑紅油，場面逼真。	埋位前，湯怡笑笑口受訪。	工作人員拿紙巾及水給湯怡清洗。

提到昨日是白色情人節，問到收工後可佳人有約？湯怡笑說：「約咗班姊妹。（想拍拖？）隨緣啦，但做女仔都想畀人錫嘅。」