蘇永康為個唱搣甩17磅
歌手蘇永康將於6月21至22日與中樂團合作開紅館騷《蘇永康ALL THAT JAZZ & POP LIVE 2019》，昨日舉行記者會，多位好友拍片恭賀，包括張衞健（Dicky）、梁漢文、任賢齊、容祖兒、陳奕迅（Eason）、草蜢、謝安琪等，其中小齊笑言要同蘇永康齊齊Keep Fit、祖兒與Eason則自薦幫手湊B。而片段中壓軸現身的Dicky就大帥哥上身，數白欖一口氣說出蘇永康的經典歌名，還化身購物平台主持力Sell門票，計埋條數不斷話「抵睇」，搞笑又有愛，最後更預告或會隆重震撼登場！
身穿藍色花花西裝的蘇永康被問片段中的嘉賓會否上台表演？他表示歡迎他們前來欣賞：「中樂團成86人，如果有朋友想上台玩即興都搵唔到位企。」又指有意邀幾位未於紅館合作過的朋友上台合唱，而由於與中樂團合作，故嘉賓環節最困難是準備樂譜。
製作費歷來最高
現場所見蘇永康清減不少，他自爆由年初八開始做運動，現已成功減去17磅，即被司儀森美笑指可超越許志安，但他說︰「唔敢同佢爭，佢排腹肌貼上去咁，百年歸老都仲喺度！」引來全場爆笑。他又指是次開騷是歷年來最高製作費︰「成本貴過晒排舞同搵Dancer，又要上廣州綵排，中樂團嚟要包佢哋酒店，雖然好貴，但想做。」
問到如何分配湊B時間？他表示每日起身後會抽時間陪囝囝玩，講到日前被本報影到一家三口去國際英文幼稚園面試，問到見了多少間？他迴避地說：「邊有家長淨係見一、兩間。」