「老竇」劉丹陪開工：佢好堅強！
藝人劉丹及蘇韻姿昨日到將軍澳電視城為處境劇《愛·回家之開心速遞》開工，講到劇中女兒呂慧儀最近驚爆已離婚，劉丹表示早上有跟她拍攝外景，對方心情完全冇異樣：「如果唔係有呢單新聞都唔覺佢有呢件事，佢好堅強、開朗，正常開工。（係咪呢幾個月佢都冇同大家講已經離咗婚？）我哋都冇乜邊個知，佢仲好多笑容。（呢排錫佢多啲？）如果佢都冇嘢，我哋都唔好加把口，講得多仲衰，我一直覺得呢個女仔好犀利，係女丈夫，返工之餘每朝晨早會湊個仔返學，收工又陪住個仔，係廿四孝媽咪。」
兩人又透露今次是第一日在新廠17廠拍攝，感覺開心，劉丹說：「地方寬敞，個廠景又實淨，有新廠意味住我哋長拍長有，真係要挑戰《真情》紀錄。（嚟緊你有咩突破演出？）犀利喇！我將會同羅樂林、陳榮峻幾個老嘢一齊Rap！Yo！我哋成家仲會跳芭蕾舞，我最驚大家捉住我哋出唱片同登台咋！」並指曾習芭蕾舞的韻姿可大派用場。