陳小春開騷避飛債同囝囝鬥搶鏡
陳小春忙為巡唱演出，自去年11月在成都揭幕後，已先後在佛山、南京及深圳表演，4月6日小春將移師到澳門威尼斯人金光綜藝館舉行《陳小春STOP ANGRY巡迴演唱會澳門站》，昨日進行信用卡優先訂購，不到3小時已被搶購到僅餘小量門票，而3000張內部認購同時宣布爆滿，今早門票將作公開發售。
𢱑紅館畀檔期
小春得知門票反應熱烈，大感意外：「完全諗唔到，我只知家人同朋友訂咗好多飛，我要先旨聲明，大家唔好打畀我，搵我啲同事同屋企人啦，佢哋會好好幫我招呼大家，我驚冷落咗大家唔好意思。」至於澳門站會否加場，就交由主辦同場館決定：「我專心演出，依家賣得咁好已經好滿足。（幾時在紅館開騷？）我都好想，等咗好耐，希望紅館睇到新聞，同情吓我又好，咩都好啦，畀一場我都心足。」
「古惑佬」踩台？
小春對澳門有情意結，因當年電影《古惑仔》在當地拍攝外景，所以今次到澳門開騷好開心，屆時家人都會來支持。囝囝Jasper因拍《爸爸去哪兒》而人氣高企，曾到成都捧老竇場的他，為免引起哄動，曾被有關方面要求開騷後熄燈才入場，但依然引起觀眾歡呼，曾有熱情粉絲想爬入其包廂，吸引力不遜父親。
小春之前在佛山巡演，鄭伊健、錢嘉樂等一班「古惑佬」兄弟專程飛去捧場，未知今次澳門騷他們會否上台合體演出？
