陳偉洪星途浮沉：擔正都要有實力
入行10年的藝人陳偉洪（Calvin）拍了逾70部劇集，早年以《點解阿Sir係阿Sir》飾演「蔣進」而為人熟悉。雖然一直未有機會擔正，但他深明娛樂圈需要運氣和際遇：「我本身唔係一心做呢行，慢慢拍劇先發現愛上呢個行業。做戲好講個人經歷，除非天生對演藝好有觸覺，所以最緊要係做好自己，擔正都係要有實力。」
與Calvin同屆參選香港先生的許家傑， 近年憑「送水輝」一角成功入屋，二人少不免被外界比較。但Calvin表示絕不妒忌：「一直以嚟見到許家傑好努力，之前大家唔係太多嘢做，會私下約出嚟對戲，拎人哋嘅場口去做， 再錄低睇吓自己嘅不足。依家有時拎番出嚟睇覺得好好笑，所以見佢『送水輝』嘅角色咁受歡迎都好戥佢開心，皆因佢真係好努力。」