陳松伶力王上身抱起紙板陳煒
陳松伶與陳煒因拍劇成為好姊妹，前晚二人錄影節目時，松松突然「力王」上身，將陳煒抱起！她取笑陳煒瘦到似紙板公仔，並指對方太忙：「好耐都約唔到食飯！」
藝人汪明荃、森美、蘇永康與余德丞前晚為主持的新節目《娛樂大家》錄影，邀得陳松伶、陳煒、黃智賢、麥明詩及江嘉敏等擔任嘉賓。拍照期間，松松突然抱起陳煒，並笑說：「佢瘦到似紙板公仔，所以想試吓抱起佢。我哋合作《福爾摩師奶》後情同姊妹，不過好耐都約唔到食飯，約佢食飯要同監製度期先得。」陳煒則指拍完劇集《法證先鋒Ⅳ》有空檔，會到上海欣賞松松演出的舞台劇，到時再聚。提到《福》劇收視，松松相信中規中矩，因很久沒有這類型的本土劇。
「#汪阿TAG」着上身
至於早前自創「汪阿TAG」的汪明荃，穿上印有「#汪阿TAG」的黃色套裝，玩味十足，她笑說：「套衫係公司設計，節目都會玩吓啲潮嘢，自己每次都想做新鮮嘅節目。」問到新節目與之前的節目《阿姐有乜未見過》可有關係？她說：「上次只係一個嘗試，同今次節目形式唔同，都想公司有多啲綜藝節目，因為一到大騷，大家見面時好似有啲生疏。綜藝節目不嬲都係TVB嘅強項，可以訓練新人，亦可以加入唔同元素，如果想吸引多啲嘉賓返嚟，都需要有呢啲節目。」
問汪明荃可會邀請老公羅家英擔任嘉賓？她笑說：「佢依家喺橫店拍緊佢做男主角嘅電影，我未見過佢咁勤力睇劇本，遲啲又要去台灣做嘢，佢好忙。」而蘇永康表示跟阿姐合作抱學習態度，讚對方很玩得，不像傳聞般拘謹。