阿Sa終極目標攞影后

有份角逐今屆金像獎影后的蔡卓妍,直言恨攞獎,因為是演員的終極目標!迄今其出場戰衣尚未有頭緒,過往為了準備出場服,除了要飛去外國跟人「爭裙」,又要追捧超級品牌,以高端行頭贏取終極戰利品。

蔡卓妍(阿Sa)、惠英紅、黃秋生、內地演員曾美慧孜和余香凝等前晚出席香港電影工作者總會春茗。有份角逐金像獎影后的阿Sa,仍未準備戰衣,笑言冇頭緒甚至「有啲呢Hea」,問可會搵人設計,她說:「好多人好膚淺,淨係會睇牌子同行頭,所以我冇辦法唔隨波逐流。(叫老闆楊受成畀珠寶你戴?)老闆娘次次都好幫忙,喺保險箱畀我揀珠寶。(有冇信心?)我話冇又好假,我話有又好似好唔謙虛,OK啦!(有冇睇其他候選人嘅戲?)睇咗啲,覺得入圍已經好好。(曲線讚自己?)我都OKo架!(恨攞?)話唔恨係呃你,係一個演員嘅終極目標。」

吳鎮宇指秋生攞獎格

曾美慧孜亦獲提名影后,她亦表示很有信心,問到阿Sa是否最大對手?她說:「我很喜歡她的歌曲《下一站天后》,是我會唱完整的粵語歌。」而吳鎮宇則率領《逆流大叔》演員班底余香凝、胡定欣和胡子彤等出席春茗,此片有5位演員獲提名,鎮宇更是候選影帝,被問到信心,他笑說:「有啲嘢以退為進!」有指是他與黃秋生之爭,鎮宇笑言:「一定係秋生啦,冇睇佢套戲,但聞到陣除都已經好勁,佢用個頭嚟演,頭部以下唔郁得,呢啲係攞獎格嚟o架嘛。(輸畀佢個頭?)係囉。」余香凝叫三飛包括最佳女主角、女配角及原創歌曲獎,她的心水影后是曾美慧孜,女配角則睇好惠英紅及周家怡。入圍最佳新演員的胡定欣則說:「收到消息嗰刻好開心,雖然喺電視台N年前都攞過新人獎,但呢種感覺係另一樣嘢,好開心。」

「佢輸個頭 我輸隻舟」

至於角逐影帝的黃秋生說:「冇咩所謂,有就梗係好,沖喜吓,冇就冇計。(同鎮宇之爭?)是但啦,邊個攞都咁開心。(佢話聞到你陣除都知你贏?)咁誇張?我鬆毛鬆翼啦!(有睇佢部戲?)我冇睇都知佢贏啦,睇佢啲硬照就知佢勁。(咁你咪輸畀佢隻『舟』?)咁佢輸畀我個頭,我就輸畀佢隻『舟』!」