文凱玲無悔全裸想再慘啲！

藝人文凱玲（Connie）2010年參選港姐入行，其後簽約電影人王晶旗下，拍過不少電影及電視劇，戲路多變，於《鴨王2》全裸上陣，在劇集《賭城群英會》飾演宅女小南，到《冒險王衛斯理：支離人》則換上一頭金色短髮扮殺手，早前播出的《荷里活有個大老千》中，她飾演粵語片女星明珠，演活60年代的感覺，獲得不少劇迷稱讚。

講到要扮演陳寶珠年代的角色，Connie直言演劇中的「戲中戲」時會特別參考當年的作品：「做法同平時有啲唔同，例如動作慢啲，講嘢前加個『A…』字，一Cut機個個都笑到碌地！大家拍得好開心，仲不停食，好在嗰個年代女仔興圓潤啲，唔使減肥！」她表示最難是拍該劇時剛好拍完《支離人》，故經常忘記要笑：「做殺手完全唔可以笑，嗰排都Cool咗，到拍《荷》劇時，導演不停提我『笑多啲！你已經唔係殺手喇！』都花咗啲時間適應。而我其實係戴假髮拍嘅，自己睇番覺得有啲『的水』有穿崩，好在大家都唔覺。」

望挑戰演技

不少網友期待Connie再有性感演出，今次《荷》劇中她亦有泳衣戲及扮兔女郎跳舞的戲份，她笑言其中一套泳衣已相當低胸，但男Fans當然未夠喉。講到曾於電影作超大膽演出，她直言不會後悔，但未必會再做：「唔會諗番轉頭，都冇得改，但OK嘅，冇當時嘅嘢又未必有其他機會，但係大家印象中我係比較性感，我想試啲新嘢，一路都較少演悲情角色，最想演情緒病、抑鬱呢啲考演技嘅角色。」講到今年大計，Connie表示想學攝影：「向來影相唔多，都想記錄多啲生活，以前覺得影得唔靚就冇再深究，依家想學，幫人或幫自己影都好。」

文凱玲最想演悲情角色考演技。

講到《荷》劇的水着戲份，文凱玲（中）笑言這身懷舊泳衣已相當低胸。

場地：南瀛水產／Barry@relaxdearhk

髮型：Tin Ngai

化妝：K_y_o_makeup

服裝：Lily Brown