惠英紅密實影后水着在後頭
影后惠英紅昨晚聯同陳豪及新任品牌大使西班牙女星úrsula Corberó，在港出席高級珠寶品牌晚宴活動。她透露將會以「密實Look」出席即將舉行的各大電影頒獎禮，但豪言如果得獎，則會上載性感水着照大派福利。
昨晚惠英紅盛裝出席「BVLGARI Wild Pop高級珠寶系列」晚宴活動時，透露已為即將舉行的《亞洲電影節》活動挑選戰衣，並表示會收起性感：「我性感得去邊呀？露極都冇人睇，唔好同啲後生女搶，費事有比較畀人笑啦！」
比堅尼大解放
她又自爆其實私底下也有不少性感水着珍藏相，更揚言：「如果我攞到獎嘅話，就甫上網派福利，要諗吓一件頭定係比堅尼好。我試過着比堅尼游水，點知游游吓條帶鬆咗，好彩我游早水冇乜人，所以之後都係着番潛水衣，話晒我都係專業嘅泳手。」
同場的藝人陳豪撇甩太太陳茵媺單拖現身，他表示太太負責留家照顧仔女，又大爆他們相當黐身：「如果出埠，我哋要提早一個月通知佢哋，等佢哋有個心理準備。不過平時喺香港出去做嘢，佢哋每個都要攬過錫過先畀我哋走，但我哋都好Enjoy，呢個係有小朋友嘅樂趣。」
陳豪讚老婆湊仔叻
講到湊仔女的難處，他坦言雖然想他們學會獨立，但作為父母又想仔女依賴自己，存在好大的矛盾，又大讚太太教小朋友非常有辦法：「好似平時食飯咁，我會想餵佢哋，但老婆就教識佢哋自己食，平時我鬧極佢哋都唔聽，反而老婆一叫就即刻做，所以佢真係個好本事嘅女人。」