周汶錡湊仔瘋了
名模周汶錡前晚出席本地著名珠寶設計師好友陳瑞麟創立的珠寶品牌15周年展覽會，透露新年長假兩個囝囝留在家中，她要安排大量遊戲：「細仔識好多嘢，表演欲又強，成日同阿哥爭，又好黐我，所以抱佢哋要一齊抱，一個坐左髀，一個坐右髀。（會唔會打交推嚟推去？）梗係有！所以我咪癲咗咁樣，唔好睇我依家咁優雅咁出現，其實嚟之前成個人瘋癲，頭髮都唔得閒整！」
她又透露新年期間與妹妹周勵淇和妹夫見面，問到對妹夫有何感覺？她說：「梗係好，佢嫁得出就好好，年紀都唔細，我都想佢快啲生，生番個陪我個仔玩！（生個女？）女仔好。（佢已經有咗？）唔知喎，你問佢。」
另外，張曼玉於2004年在康城封后時佩戴的珠寶帶挈品牌爆紅，陳瑞麟表示現時仍有與她聯絡，不時約會。