阿嬌搶位幫祖兒點燈求姻緣
藝人鍾欣潼婚後要兼顧家庭和工作，故未能與好姊妹蔡卓妍和容祖兒同行到日本滑雪，慨嘆「做人難」！但為了祖兒能覓得如意郎君，已為她在金童玉女殿「點燈」求姻緣，真係唔話得！
鍾欣潼（阿嬌）昨日出席品牌活動，談到好友蔡卓妍與容祖兒到了北海道旅行，但她未有同行，她解釋：「我冇放飛機，因為公司幫我接咗Job，約嘅時候我又唔喺香港。咁我都有屋企要顧住，我係一個有家庭嘅人。（唔帶埋老公去？）就係因為佢去唔到，所以我冇去。」問到是否放老公在第一位？她說：「大家明啦！咁姊妹都好重要。（姊妹放第二位？）唔好咁講，做人好難，老公好重要，工作都好重要。」
調理身體準備生B
問到會否幫祖兒搵另一半？阿嬌自爆幫對方在金童玉女殿「點燈」：「祈求佢成年嘅愛情運，真係好難點！因為要有人放出嚟先有位點到。（好貴？）唔貴！我結婚之前媽咪有幫我點過，點完之後我就結婚。（有冇生仔燈？）咁就唔知。」她表示早前身體不適，現時要調理身子才準備生B。
陳瀅與陳家樂斷纜
同場，剛榮升媽媽的陳嘉寶（Anjaylia）產後首次亮相，問到照顧BB時有否狼狽的時候？她笑說：「初頭我唔敢抱上身，依家都唔敢同佢沖涼，驚耳仔入水。」她透露生B痛足廿多小時，至於會否再生？她說：「嗰種痛仲心有餘悸，遲啲先。」
此外，陳瀅透露將會到巴黎出席時裝周一個星期，問到緋聞男友陳家樂會否同行？她說：「拍完劇就冇乜聯絡。（拍完就冇啦？）咁都好正常，拍戲嘅時候會有交流，我同佢係普通朋友，一直都係。」