陳展鵬打到癲搞Gag扮人妖
陳展鵬與唐詩詠昨日為無綫新劇《唐人街》開工，展鵬透露角色除了打得快、狠、準外，還要搞Gag扮人妖，其「事業線」更媲美港姐，老婆單文柔也希望來探班。
藝人陳展鵬、唐詩詠、王君馨及伍允龍等，昨日在將軍澳電視城拍攝新劇外景。劇組搭出泰國場景，相當逼真。劇情講述陳展鵬與伍允龍為人妖吧開張舞獅，展鵬透露今次除了打得更勁外，還有從未試過的搞Gag戲，劇中要扮性感人妖上台跳舞，他笑說：「都幾性感o架，若隱若現，要攝嘢有啲『事業線』，拍得住啲港姐。（造型有畀老婆睇吓？）冇，但係佢好想嚟睇呢場戲。打戲就多咗好多，要快、狠、準，劇本比平時少咗三份一，因為場場都寫住大打，觀眾會好鍾意呢啲效果。」
諗定BB英文名
太太單文柔的預產期撞正劇集拍攝，展鵬並不緊張，反而心情興奮。問到是否已向劇組度期陪太太生B？他說：「劇組就冇問題，依家未決定順產定開刀，就算開刀都有機會早作動，所以預時間亦冇用。（仔定女？）未講得住，英文名就諗咗用Q字頭，係我哋英文名P同R嘅中間，中文名就未諗。」
唐詩詠秘密練武
唐詩詠劇中角色武藝高強，與陳展鵬有感情線。她坦言已習武近一個月，彌補自己的功夫底子不足。提到早前被指有新歡「教育界王力宏」陳思銘，現在忙拍劇豈不是沒有時間拍拖？她說：「唔好講到咁，之前都講咗大家係朋友，順其自然。（冇一齊行山溝通？）冇，拍完劇先，要暫停三個月。（對方體諒？）做朋友冇話體唔體諒，我啲朋友都習慣咗我一拍劇就失蹤，佢哋都唔會搵我。」
