青雲「自閉」怕心散陳家樂唔敢埋身
劉青雲、張家輝及林嘉欣主演的英皇電影《廉政風雲 煙幕》，香港票房截至昨晚已達30,629,381元，作為後輩的陳家樂對於能跟一班好戲之人合作，當然感到非常開心。他還自爆在片場很想跟青雲傾偈，但因對方氣場太勁而卻步，家樂說：「好多前輩好鍾意走埋嚟同你講嘢，亦有啲前輩會自己坐埋一邊，喺度思考、投入角色，青雲屬於後者，佢會喺自己個角色入面諗嘢，我唔係好敢行埋去騷擾佢，唔敢同佢傾偈，覺得佢氣場好勁，不過有時佢都會主動畀意見我。」他直言在青雲身上學到對角色的專注，拍戲以來幾乎沒見過對方玩手機。
唔想後悔一世
對此，青雲自嘲容易心散及遊魂，所以在片場要加倍專注，以免後悔一生：「好多時演一場戲，你要好肯定到自己係點樣，一定要好清楚同保持喺嗰個狀態裏面，就會容易啲去演。如果你差少少嘢，當你做唔到之後，你返到屋企再諗『哎呀』，咁嗰個『哎呀』就會『哎呀』一世！」
他笑言經常會「哎吔」自己：「我成日睇番自己：『哎呀！有冇搞錯，劉青雲，你點解咁渣o架！可唔可以好啲o架？』你會發覺有時就係差嗰少少嘢，好少o架咋！你Miss咗就Miss咗，好多時你拍咗先會諗：『啊，係喎，原來可以咁樣！』」
