51歲伊健紅館倒掛
鄭伊健在首場紅館個唱上被「飄移咪」玩殘，咪一甩手就直飛台底，搞到有歌唱不得，好在愈「挫」愈強，更由「古惑佬」變「體操王子」，在巨環上玩倒掛，又在氹氹轉舞台轉住唱都冇作嘔，51歲的他仲好強！
伊健前晚在紅館展開一連六場《ALONG WITH EKIN LIVE CONCERT》，父母及太太蒙嘉慧捧場外，還有車婉婉、蔡一智夫婦及姚子羚舊愛鄭子邦等。右邊束起小辮子的他，在音樂總監陳光榮和小交響樂團伴奏下，唱出《一個為你甘去蹈火海的人》等多首大熱歌曲，全場超High！
和音執生救場
他與十多名舞蹈員在四個高低不同的圓形升降台上，又唱又跳又蜈蚣彈，當走近觀眾欄時，手上的咪竟跌落台底，「冇咪用」的他無奈露出尷尬笑容，台上和音「執生」和唱。工作人員速遞「救命咪」到其手上後，他再度「充滿力量」，麒麟臂一伸就上了巨環，分別做出引體上升及倒掛等高難度動作，台下尖叫聲未完，他又和舞蹈員在氹氹轉的圓形舞台又唱又跳，連觀眾都睇到眼花，但他沒有「頭搖又尾擺」，抗離心力超高！
就住嗌養聲
唱足一小時後，伊健開金口說：「你哋好！其實我好想大聲啲，但怕嗌拆把聲，6年冇見你哋都係咁咋，要進步少少！」舞台頂設有巨型螢幕，他賣花讚花香問山頂位的觀眾：「覺得點？係咪好值先，睇我個頭大過坐第一行o架！」並自爆心情緊張。曾被取笑普通話是「煲冬瓜」的他，自信爆棚地以普通話問內地歌迷：「坐飛機過來？」然後轉回廣東話笑問：「我啲國語係咪有進步呢！」演出尾聲，他公開多謝太太蒙嘉慧，唱《我的歌》期間更感觸哽咽。
