林嘉欣惡妻上身追青雲補度蜜月
上映19天的英皇電影《廉政風雲 煙幕》的香港票房昨晚衝破3千萬元，一眾演員為之興奮。《廉》片承強勢開續集在即，戲中與劉青雲演分居夫婦的林嘉欣，笑言要「氹」導演安排他倆續前緣，便可公私兩便出遊澳洲拍蜜月戲。
《廉政風雲 煙幕》於上周二衝破港澳區3,000萬票房，而單一的香港區票房亦於昨晚突破3,005萬，成績令人振奮。金馬影后林嘉欣與劉青雲演一對同在廉署共事的夫妻，但卻處於分居狀態，感覺乏味，故嘉欣笑言向導演麥兆輝獻計，安排兩公婆重修舊好，她便可再到澳洲拍外景，享受當地優美景色。
做打女畀車撞
嘉欣與青雲不乏夫妻針鋒相對場口，為增強角色的氣場，她戴了不同形狀的眼鏡並配以港女口脗，實行惡老婆上身，震懾老公劉青雲，嘉欣笑說：「今次為角色喺好多細節位做功課，好似第一場辦公室同青雲鬥氣戲份，我專登要求戴副方形起角眼鏡，睇落去會強勢啲，同埋另一場係講我畀車撞，導演見我親身上陣，拍得似模似樣，拍完之後就話我可以轉做打星。」
片中她演廉署總調查主任，為了赴澳洲勸證人張家輝返港，青雲曾「埋怨」她為第二個男人（張家輝）追到澳洲，她寄望下集能多點互動過盡戲癮。嘉欣更向導演麥兆輝獻計，指今集故事內其實埋有伏線：「有場戲講我喺澳洲碌青雲張信用卡喪買嘢，仲話當年佢話同我去澳洲度蜜月，但最終冇去到，所以下一集梗係再去番當地，拍我同青雲補度蜜月嘅甜蜜場口，之前都有同導演講過，佢問我哋係咪好鍾意澳洲，係就下集再返去拍，我當然贊成。」