朱韻韻愛車方便收兵

身高1米75的朱韻韻（Angel），高人一等反而討厭生得高，她說：「細個影班相成日要企喺男仔隔籬，同埋細個高得太快，身體筋骨好痛，成日要爹哋媽咪幫我按摩，因為咁亦有睇醫生，醫生話可能高得太快，啲筋跟唔切啲骨嘅生長。以前覺得細粒嘅同學得意啲、受歡迎啲，我太高成人畀人覺得好大個。」

認余文樂好啱傾

Angel外表溫柔，但性格男仔頭，她說：「我好鍾意刺激，鍾意揸車，手車都好辣，由細到大對車都好有興趣。（會唔會飛車？）記得初初攞到個車牌，幾個女仔喺唔超速之下鬥快，嗰段路冇咩車，揸上嚟超爽，而最終我呢個新牌仔最快到，啲朋友都眼凸。但我未試過賽車，如果有機會，絕對樂意去做，我好享受嗰種速度感，比起個樣，我（其實）好大膽。（同余文樂傳緋聞，係咪因為大家鍾意車？）大家係識咗多年嘅好朋友，有相同嗜好會好傾啲。（同佢好投契？）好多男仔都鍾意車，會覺得女仔識車係特別啲嘅，我識得深層啲，會多啲男性朋友。」

開Live變「愛情信箱」

除了做模特兒，Angel亦向網上發展，與Followers互動，她說：「發現香港人有好多感情問題，想搵人傾訴，我個人好樂觀，可以帶正能量畀人，同人解決感情問題，所以喺IG有Q&A或開live盡量解答佢哋問題，佢哋啱聽，我都開心同好有滿足感。（係咪因為有豐富感情經驗，所以開解到別人？）又唔係，但身邊有好多朋友鍾意搵我傾訴。」

現時單身的她提到過往的感情，她表示就算分手亦可做回朋友：「冇一個做唔到，兩個一齊去到一個階段如果唔開心，咁不如分開，做唔到情侶做番朋友會仲好，大家會更珍惜關係、更長久，好過勉強一齊。」

場地：Mini Hotel