開工幾日就埋牙 黃翠如林文龍上完床生變熟！

林文龍「萬歲」請食雪糕，翠如梗係唔客氣。

無綫新劇《致所有愛過的人》日前到中環街頭取景，拍攝翠如與文龍甜蜜拍拖的戲份，吸引不少途人圍觀。期間，心情大靚的文龍「萬歲」，請全組工作人員歎雪糕，難怪翠如笑說：「有龍爺（林文龍）嘅地方，我哋一定有口福。（佢成日請食嘢？）好犀利啊！去餐廳攞個Menu就任叫！」難怪兩人指接拍此劇開心之餘，台前幕後亦很團結。

蕭正楠探班呆坐幾粒鐘

雖然首次合作，但兩人已相當熟落，文龍搞笑地頻叫翠如做「蕭Auntie」，搞到她哭笑不得！由於劇中飾演情侶，當中不乏相擁及拖手戲份，但兩人原來在開鏡之初已拍攝床戲，文龍說：「開工幾日就拍！好彩嗰時唔係咁熟，太熟反而難演，拍完嗰場戲我哋就開始熟喇！（覺得翠如呢位拍檔點？）好有主見囉！」問到另一半可有探班「監場」，翠如大方「放閃」說：「早排佢（老公蕭正楠）都有送我去屯門藍地拍外景，佢就坐喺車等我收工，然後一齊去食飯睇戲！」文龍則表示每次外景都路途遙遠：「我都差啲迷路，我老婆點會出現吖！」

兩人演情侶，呢啲攬攬鏡頭只係小兒科！	翠如指老公蕭正楠寧願呆等都嚟探班，甜到漏喇！	林文龍到中環拍外景，粉絲爭住集郵。

劇集還有個多月才煞科，不少重頭撞車戲仍未拍攝，翠如說：「個古仔係由撞車引起嘅，開場同結尾都係嚴重撞車戲，龍爺會攞佢啲名車出嚟協助參與拍攝！」談到今次有不少新演員包括蘇皓兒及李任燊等加入，文龍坦言有火花：「佢哋好似白紙一張，畀到自然嘅感覺，大家有新火花，都係開心嘅。」