梁雪瑤開工遲到高層照肺

亞視不時傳裁員，但照搞台慶、新春盆菜宴照食，老闆更每人派500元利是。而亞視本身藝人不多，《2018亞洲小姐競選》香港賽區冠軍梁雪瑤可謂現時亞視一姐，多個場合都由她來「撐場」。對於公司不時傳出負面新聞，她亦表示不擔心，更直言：「都控制唔到，惟有做好自己。」

不過，人前人後卻兩回事，據知她當選後性情大變，自覺升呢隨即「現形」，除了突然間擺出「阿姐」架子外，對公司的安排更經常諸多不滿，連新人最基本要求守時都未能做到，工作事無大小也頻頻遲到，引起工作人員不滿，之前她第一次拍攝廣告也遲到近半小時，得失米飯班主。

知衰揚言會改過

據知，高層得知後已召梁雪瑤返公司「照肺」，勒令她即時就遲到問題及工作態度作出改善，否則最嚴重會「雪藏」處分。梁雪瑤接受本報訪問時被問到頻頻遲到一事，她說：「都唔係，唔知點解有咁嘅傳聞，試過遲一、兩次，唔係好耐，都係遲15分鐘左右，可能自己比較姿整，有時可能會遲咗少少，自己都會改善嘅。（話你耍大牌？）唔知點解有人會有咁嘅感覺，首先我唔覺得自己好叻，我只係香港區冠軍，唔係總冠軍，可能我唔講嘢個樣會Cool啲，或者因為咁引起誤會，其實我同亞視啲工作人員都相處得好好，大家合作得好開心。」