張家輝點復活？麥兆輝𢱑爆頭
英皇電影《廉政風雲 煙幕》票房甚佳，年底更會以過億製作費開拍續集，導演麥兆輝坦言首集未開鏡時，已決定拍足三集。至於演員各有想演的續集角色，他笑言：「邊有咁易估到我想點！」講到張家輝在首集已死，如何在續集「重現」，正是他最費煞思量的難題！
由麥兆輝執導，劉青雲、張家輝和林嘉欣等主演的英皇電影《廉政風雲 煙幕》票房凌厲，台前幕後振奮不已，麥兆輝感激老闆楊受成無論在創作和拍攝上均給予很大自由度，他接受專訪時坦言：「唯一係當初開拍呢套戲時，楊生好鍾意《廉政風雲》呢個名，但我就好喜歡《煙幕》兩個字，因為套戲講私煙、人心難測好似滿布迷陣咁，好彩我喺廉署做資料搜集時，發現有幾個故事都好吸引。我就同楊生講，不如開夠《廉政風雲》上、中、下集啦，所以同《無間道》同《竊聽風雲》嘅情形唔同，呢次係首次（電影）未開鏡，我已決定拍足3集。」
新故事講圍標
繼《煙幕》後，英皇將投資《黑幕》及《內幕》兩集，以本港圍標問題做故事骨幹的《黑幕》，最快於年底投入拍攝：「題材可能會同《竊聽風雲3》有啲類似，我覺得圍標犯案好難查，記得1、2年前香港沙田某屋苑，業主立案法團主席同其他人夾埋圍標，結果搞到好大件事，呢單案畀我印象好深，亦明白咁對民生影響好大，所以先有咁嘅構思，今次全片應該只喺香港取景，製作費同《煙幕》差唔多，預算1億左右。」
問到會否原班人馬演出？他說：「盡量啦，都諗緊角色擺位，好似張家輝已經死咗，我又接受唔到續集佢行出嚟就話係孖生兄弟，或者有血緣關係但長得一模一樣嘅人。」
延續青雲感情線？
麥導坦言可以有兩個方案，首先是原班演出嶄新故事，又或者延續《煙幕》的故事再作處理，因有感「個古仔未講完」﹕「我想講落去嘅，係劉青雲同林嘉欣嘅夫妻關係，《煙幕》結尾時佢哋好似和好如初，但又未必風平浪靜，加上青雲被廉署炒咗，係咪真係咁簡單呢？」談到眾演員天馬行空自行創作續集角色，他聞言即笑說：「咁都得？講吓咋？真係想演乜就乜咩，邊有咁易估到我想點吖？」