李泳漢囡囡百日宴 催泳豪結婚生番件
藝人李泳漢昨晚為次女李佩璇（Charlotte）於尖沙咀舉行百日宴，筵開12圍，再次榮升爺爺的李家鼎、嫲嫲施明及叔叔李泳豪等紛紛現身，場面熱鬧。李家鼎抱起孫女全程冧爆，問到泳漢及泳豪有否呷醋？泳漢笑說：「冇！睇得出佢真係好鍾意女囉！我反而驚大仔呷醋就真。」泳豪則說：「我起先以為會錫姪女多啲，但直至依家都係姪仔黐身、好玩啲，所以我錫哥哥多啲。」
李家鼎冧爆「前世情人」
泳漢接口：「我個女太冷靜同成熟，反而囝囝天真啲。（再追多個？）我本身鍾意仔嘅，都想再生多個。（想仔女將來報讀名校？）唔想催逼佢哋，只希望佢哋有個美好嘅童年就得。」泳豪坦言因為忙飲食生意、拍劇及賽車，暫未計劃終身大事，且透露稍後會與泳漢夾份開食肆分店，而泳漢都希望他能早日成家立室生BB。
李家鼎稱孫女為「前世情人」，且笑說：「我條女呀！自己都恨生女，可惜冇，所以自己個仔追到個女都好開心，孫女個名係佢嫲嫲搵人改。（送乜畀孫女？）睇佢有乜需要啦，如果負擔得到都會幫手，自己啲血脈嘛，心意上一定支持。（鼓勵阿仔再生？）依家香港嘅教育制度畸形，小朋友讀書，父母要陪讀，好似虐待啲小朋友咁，但如果好似以前咁，再生多幾個都冇問題啦！（想啲孫讀名校？）個個父母都望子成龍，只要唔作奸犯科就得喇！」