黃建東自創催財三式 豬籠入水做業主
藝人黃建東今年「慳出個未來」，成功儲夠首期準備上車。眼見即將做「樓奴」，開支隨時一闊三大，阿東決定發揮「慳家本色」，就地取材用家中物品包括米、水及金豬公仔等，自創出「催財三式」，希望來年豬籠入水賺個不停！他表示早前買金豬公仔迎接豬年，而「豬」又有「家肥屋潤」及「諸事亨通」等好兆頭，決定「一物兩用」，將公仔放在床頭，寓意好運「由頭行到落腳趾尾」！
就地取材零成本
講到家中放置白米及水，阿東亦相當有諗頭：「我哋中國人成日都話『水為財』，所以喺屋企放咗一盆水，仲特登揀放東邊，因為我個名有個東字，應該旺我！至於白米，話明『有米、有米』即係有錢咁解，所以喺角落位擺放白米，等我下年可以賺到盆滿缽滿，愈嚟愈『有米』。」全部均選用家中已有物品，整個布局不用分文，阿東不愧是「慳家好男人」。
陳子才教路 放啱位仲掂
黃建東以金豬、白米及水等法寶招財，堪輿學家陳子才表示此舉非常可取，但建議東邊應放置六粒白色石春，水則可放在家中「中宮」位置，進一步加強催財作用：「娛樂圈可以話係食『四方飯』，喺家中四角放白米，寓意四處有米路，大吃四方。」
