袁詠儀貪到盡 陳家樂玩奸殺

陳家樂自薦轉做「內鬼」，愈奸愈過癮！

《廉》片導演麥兆輝近日已着手籌備續集劇本，希望年底開鏡，演員包括林嘉欣、何遠東與袁富華等都對自己的「下場」深謀遠慮！客串演貪污海關高層的袁詠儀（靚靚），短短幾場戲已令觀眾留下深刻印象，談到開拍續集時笑說：「只要有啱嘅角色、好玩嘅可以再合作，如果再演呢個海關高層仲好，因為想睇吓貪污嘅人有乜下場！」扮演劉青雲下屬的陳家樂則忽發奇想：「梗係想玩吓新嘢，有組織犯罪集團安排我去廉署做臥底，最終我殺咗青雲同家輝，最奸嗰個係我！」想變奸角原來不止一人，湯怡希望可以加入《無間道》的元素：「我演奸角，走甩咗個犯原來係我，先知有內鬼，同埋想加啲打鬥場面！」

林嘉欣恨加青雲對手戲

至於女神林嘉欣笑言做甚麼也沒所謂，但指定要與青雲有更多對手戲：「唔係做佢阿媽就得喇！」戲中被青雲「欺凌」的何遠東，搞笑指曾懷疑角色一直暗戀嘉欣，希望有下文：「我可以扮員工送電子零件畀嘉欣，向佢表示仲好鍾意佢！或者我捲入偵查案件，同青雲做對頭人。」至於另一亮點、扮演辯護律師的吳岱融坦言想續演大反派：「演啲有腦、有思維嘅幕後黑手，例如嗰啲黑幫大佬，好似當年梁家輝演《黑金》個變態角色咁，最有得畀我發揮！」

湯怡同樣想做奸角，大玩「無間道」Feel。	袁詠儀唔介意繼續客串，最緊要好玩。	林嘉欣視青雲為偶像，希望續集能與對方有更多對手戲。

相反，演家輝好友的袁富華最易話為，交由麥兆輝「主宰」命運便可：「過往佢安排畀我嘅角色次次都中，所以去到現場先話我知演乜都冇問題。」客串演Uber司機的陳炳銓則希望「升呢」入職交通部，向青雲及家輝抄牌報仇。