湯沛宜挑戰極限雙杆分腿
新一代健美女神湯沛宜（ToTo）早前贏得健美比賽名次，除了熱愛做Gym，她亦喜歡挑戰極限運動，在欄杆上做出劈腿及翻騰動作，睇到人嘩嘩聲！她坦言起初只是打算玩高空瑜伽Keep Fit：「有朋友見我喜歡向難度挑戰又捱得，就介紹我玩街頭健身呢類極限運動，我記得第一次去練習場地，見到好多高手喺度練習，好想有日變成佢哋咁。」
ToTo直言每次完成一個極限體能動作，肌肉線條都會更明顯：「要用全身唔同部位嘅肌肉去支撐加平衡借力，練習動作外仲要做肌肉訓練，磨練意志同耐性！（有冇受傷？）冇大傷，要知自己極限，唔能夠逞強，反覆練習。」
