彭懷安我做開衰人！

前港姐朱慧敏（Queenie）與藝人彭懷安於2011年相戀，2015年爆出男方偷食而分手，婚事亦告吹，雖然之後多次被影到一齊，但戀情一直低調。日前Eddie接受東網節目訪問，聲稱曾為二人的感情努力過，殊不知刺激到Queenie的神經，忍了多時的她大爆對方「謊話連篇」。據知，Eddie神龍見首不見尾，一時又話結婚，轉頭又玩失蹤，才令女方爆煲！

Queenie昨日受訪時坦言：「今日係人日，都希望大家開開心心，我覺得彭先生應該面對番我同佢自己！」又表示之前二人的關係，自己都是被動：「我都冇話要結婚，係佢提出，之後唔搞，唔係因為傳佢同其他女仔約會，而係籌備婚禮期間，佢又失咗蹤。」她坦言要重新起步，忘記Eddie：「我以前太過信佢講嘅嘢，今年一定要徹底忘記佢，佢個人係善良，對身邊所有朋友都善良，只係對我就唔善良啫！我唔想再同彭先生再有任何關係！」

留言疑似寸爆舊愛

記者昨日致電Eddie，對於Queenie的指控，他只以短訊回覆短短八個字：「多謝關心，我冇回應！」他昨日亦有返電視廣播城開廠拍劇，從容面對，但對所有問題都沒有回答，只說：「關於感情嘢都唔回應！」問到會否怕影響形象？他說：「我一向做開衰人，都冇乜嘢。」還強調現時單身。而他又在社交網留言，疑似寸爆Queenie說：「學會諒解自己，寬容別人是美德，我們沒有資格沒有理由嘲笑別人，大家都是普通人，誰也不是神。不要動不動就站在道德高地譴責別人，學道要學的是我們能放生自己，也放生別人……」