黎諾懿偏方追女 搞到殘晒!
藝人黎諾懿與太太李潔瑩（Nicole）育有可愛兒子小春雞，恨女恨到流口水的他，更透露已開始全力造人追「豬女」！日前黎諾懿一家三口全員出動濕平，見到女童服飾時愛不釋手，更將髮飾放在兒子頭上扮女仔，場面搞笑！為求「追女」成功，黎諾懿出盡法寶「自殘」：「有人話如果想生女，嗰排要成日食紅肉，但我又唔食紅肉，點樣令到身體酸啲呢？惟有盡量搞殘自己，搞到個人好攰都會生女。造阿仔時我好精神，依家就開始弱弱哋，應該係女，呢兩個月要積極衝刺，但最終都要等個天畀。」
心痛囝囝「聞氣」
對於兒子去年因喉喘鳴而入院，他回想起當日與太太夾手夾腳「逼」兒子「聞氣」，可謂心力交瘁，故今年願望當然是兒子身體健康。而Nicole現時全力照顧囝囝，笑言全心等老公養：「其實我都有做吓KOL，主力喺屋企做，因為唔放心囝囝畀工人湊。」
唔准老婆接戲
而黎諾懿反而想老婆工作，但幕前免問：「只要佢鍾意，做唔做嘢我都冇所謂，拍戲咁辛苦，屋企有我一個已經好夠，就算叫阿仔做童星我都唔畀。」又透露將有新搞作，會主持烹飪節目，並請來鄭伊健等助陣。
