袁偉豪獲翠如教路海外娶寶兒

藝人袁偉豪(Ben)與女友張寶兒昨日到珠海賽車,他笑言不時訓示女友,執正對方的駕駛技術及態度。二人又指已跟雙方家長拜年,被瘋狂催婚,Ben又大爆好友黃翠如介紹多個海外婚姻註冊方法,令他心郁郁。

(特派記者陳偉立珠海報道)袁偉豪、張寶兒、黃致豪與胞弟黃長發、謝東閔、黃嘉樂、甄詠珊及鄧穎芝等,昨日到珠海參與新春Kart車慈善賽,分男女子組比賽。Ben表示近兩年有玩賽車,問有否向女友教路?他說:「有研究吓,安全最緊要,佢以前揸到好似孖寶賽車咁,啲人記得佢因為畀佢撞過!」講到早前寶兒揸車時遇到不禮貌司機,Ben出言護花,但笑言平日亦有鬧女友:「揸車快得嚟唔好累到人。」寶兒笑他似教車師傅般嚴厲,Ben即說:「我會分享路面經驗,都係想自己坐得安心啲,之後我靠佢喇!」

二人又表示新年期間有向對方家長拜年,問到有否被催婚?Ben說:「個個都咁講,又畀蓮子我哋。」但他表示人生大事會依照自己的步伐,並笑說:「尋日同黃翠如見面,佢介紹好多海外婚姻註冊方法畀我。(想喺海外註冊?)想o架!」寶兒則未有表態。

而負責牽頭纜發起活動的黃致豪透露曾夢想做車手:「我揸車都幾叻,希望可以好似郭富城、林志穎咁,代表到香港藝人參加比賽,之前有玩過Formula 3,但太太覺得太危險。」而長發談到近況,表示搞模特兒公司,又希望今年有BB,至於會否復出幕前?他說:「想客串吓,同哥哥合作。」比賽結果男子組冠軍為黃致豪、亞軍黃長發、季軍林子博;女子組冠軍潘盈慧、亞軍可嵐、季軍關伊彤。

𢭃蕭太利是 洪永城感慨

另外,洪永城前晚到黃翠如及蕭正楠屋企拜年,大讚好拍檔變得賢良淑德,他在網上留言:「等咗你咁多年終於收到你嘅利是,嗰陣仲以為一世都冇咁嘅機會,仲曾經諗過儲錢畀你買姑婆屋!」翠如回敬:「喺你仲未娶到老婆前,煎蘿蔔糕畀你食,不過娶到老婆之後,就唔好打搞我哋!」