袁詠儀拒撩青雲「舊情人」冇偈傾
英皇賀歲電影《廉政風雲 煙幕》自大年初一上映以來，票房不斷報捷，至昨晚年初五累計票房已高達1,700萬，三位主角張家輝、劉青雲及林嘉欣功不可沒外，同樣有分量、以客串身份亮相的影后袁詠儀亦相當吸睛，揚言全因舊拍檔青雲才點頭答應演出；而另一位客串的袁富華，則難忘被困雪山幾日拍攝被槍殺戲份。
片中客串「海關關長」的影后袁詠儀（靚靚），當初答應參與拍攝，除角色要好玩、與導演麥兆輝有「親戚」關係外，其實最大原因是與她默契十足的劉青雲演對手戲，沒料開工第一天卻是凌晨時分，令她不期然講對白𦧲晒脷：「好彩我專業又仲後生，頂到！」
私下冇話題
她不諱言心目中最有默契的演員，絕對是劉青雲，雖然雙方合作十部電影，私下對白卻不足十句，但一埋位自然心領神會，笑指未有特別撩他閒聊：「人哋鍾意講就講，唔講就唔講，我份人就係咁，啱傾咪傾多兩句，好鍾意講食同玩，初頭同青雲都會講一兩句：『你食咗飯未？』佢就答：『食咗！』之後唔會再問佢食乜，佢平時開工都好少講嘢，鍾意靜啲，我哋又唔係有心病，只不過係冇話題啫！（有舊男友感覺？）冇咁深情，青雲令我感覺好親切，好信任佢，知道開工同佢拍呢場戲，唔會有任何問題，好舒服。同佢合作嘅作品，最深印象唔係《新不了情》，當時同佢仲好生疏，我反而最記得《整蠱王》同《大三元》，因為合作過好多次，熟絡咗。」之後她與兒子於街上遇過青雲，當時即狂Sell他有型兼靚仔，更着兒子與他合照。
《廉政》5日票房1,700萬
而金馬獎「最佳男配角」袁富華亦有份客串，扮演張家輝好友的他，最終為對方而死，他坦言於澳洲雪山拍外景認真「一額汗」：「因為抵達時差唔多天黑，當時同外界嘅聯絡訊息接收得唔係咁好，唔可以好快咁會合劇組，惟有喺架車度等，點知一打開車門就風雪飄搖，好得人驚！」最終於雪山呆等數天才能正式拍攝：「太大風雪根本拍唔到，好彩後來都算埋到位，場戲講我瞓喺雪地上辭世，因為離工作人員嘅指揮位置好遠，所以我帶咗手提電話方便聯絡，點知拍完場戲個電話點撳都冇反應，原來係大風雪到扯乾晒冇電，我都係首次見到咁嘅情形！」此外，《廉》片昨日單日票房逾200萬，累積五日票房高達1,700萬。