莊思敏孖金融男「餃」埋個幾鐘！
現年38歲的莊思敏單身多時，至今仍未有着落，難怪母親亦戥她心急要安排相睇。踏入豬年似乎「破Dry」有望，她被發現與一名西裝男現身中環撐枱腳High Tea，一碟餃子兩份食，更被男伴冧到不時甜笑，兩人足足「餃」埋個多小時才捨得走人！
父親為馬來西亞拿督的莊思敏出身富貴，家族身家估計高達8億，貴為拿督千金，物質上可謂要乜有乜，但愛情卻是千金難買。外表「烈女」的Jacquelin，自從2011年與拍拖5年的吳浩康分手後，雖然先後與廖碧兒舊愛林忠豪及導演葉念琛傳過緋聞，惟真命天子未見出現，至今仍是「盛女」。
甜笑撐枱腳
早前Jacquelin自爆農曆新年會返家鄉馬來西亞過年，心急的莊母除了經常傳男仔照片給她外，亦落力為女兒安排相睇，她亦坦承喜歡穩重型男士。日前下午4時半，戴着太陽眼鏡、一身藍色打扮的Jacquelin獨自現身中環商場，沿途不時望着商場內一間開放式餐廳似在搵人，未幾見她步入餐廳，期間巧遇相熟朋友，打個招呼後便入內會合一名在內等候的西裝男，雖然當時男方正傾電話，但兩人甫見面即展露笑容。
Jacquelin坐下後兩人睇餐牌有商有量「柯打」美食，原來他們點了一碟餃子開心Share，還邊食邊傾，她更被男方逗得頻頻甜笑，而她亦動作多多，不時風騷撥弄秀髮。一碟六隻的餃子，二人撐枱腳卻撐足個多小時才埋單離開。
「唔好嚇親佢」
昨日記者電話訪問Jacquelin，對於與西裝男甜蜜撐枱腳，是否終於有「愛情運」？她說：「我身邊好多男仔Friendo架！（但你地一碟餃子兩份食好Sweet喎？）我叫佢幫手食啫！（有冇發展機會？）佢係我朋友嚟o架！唔好嚇親佢。（佢做乜嘢o架？）佢做金融o架！我哋識咗好耐。（有啲識得耐先會突然爆出愛火花？）呢啲嘢順其自然啦！（呢段時間仲有冇其他合眼緣人士出現？）我身邊好多男仔朋友，我唔刻意留意，都係嗰句隨緣啦。」她頻叫記者唔好嚇親這位金融才俊，似乎發展機會頗大。
提到在馬來西亞過農曆新年時，媽咪有否再安排相睇？她說：「冇呀！都冇介紹男仔畀我。」問到會唔會試吓找玄學師傅幫手？Jacquelin大方說：「好呀！我都唔介意，如果得，都想快啲有拖拍。」